Punëtoria e dytë vjetore e Rrjetit të Arsimit të të Rriturve në Kosovë (ALE NK)

Nga data 21 deri më 24 dhjetor 2024, në ambientet e Hotel Opera, Tiranë, DVV International në bashkëpunim me anëtarët e Rrjetit ALE NK organizoi punëtorinë e dytë vjetore të Rrjetit të Arsimit të të Rriturve në Kosovë (ALE NK). Qëllimi kryesor i punëtorisë ishte funksionalizimi dhe fuqizimi i Rrjetit Kombëtar të Arsimit të të Rriturve në Kosovë (ALE NK).

Kjo punëtori mblodhi 14 pjesëmarrës, përfaqësues të institucioneve publike dhe private si dhe anëtarë të bordit drejtues të Rrjetit ALE NK. Ndër pjesëmarrësit ishin përfaqësues nga Ministria e Arsimit, Shkencës, Teknologjisë dhe Inovacionit (MASHTI), Agjencia për Arsim dhe Aftësim Profesional dhe Arsimin e të Rriturve (AAAPARr), Agjencia e Punësimit e Republikës së Kosovës (APRK), Qendra pë Arsim e Kosovës (KEC), Kolegji Evropian i Kosovës (ECK), Qendra Rinore – Hareja, si dhe OJQ THY dhe dy Qendrat e Arsimit dhe Edukimit të të Rinjëve dhe të Rriturëve në Kosovë, YALEC Prizren dhe YALEC Peja.

Fjalën hyrëse të kësaj punëtorie e mbajti z. Lah Nitaj Drejtor i Departmentit të Arsimit Parauniversitar në MASHTI, i cili vuri në dukje rëndësinë e veçantë të kësaj punëtorie dhe mbështetjen institucionale për arsimin e të rriturve në Kosovë. Ai theksoi arritjet dhe punën e bërë deri më tani në këtë fushë, duke nënvizuar se MASHTI është duke punuar në reformimin dhe hartimin e një legjislacioni të ri për Arsimin dhe Aftësimin Profesional.

Gjithashtu, z. Nitaj theksoi se, kjo punëtori do të adresojë shqetësimet dhe sfidat me të cilat përballen aktorët relevantë në arsimin e të rriturve. Këto diskutime pritet të kontribuojnë ndjeshëm në procesin e hartimit të ligjit të ri, duke siguruar që ai të pasqyrojë nevojat dhe prioritetet e këtij sektori.

Z. Ramadan Alija, Udhëheqësi i DVV International në Kosovë, shprehu mirënjohje të veçantë për të gjithë anëtarët e Rrjetit ALE NK, duke vënë theksin te aktivitetet vjetore të zhvilluara me sukses nga rrjeti në bashkëpunim me DVV International, përfshirë punëtorinë e mbajtur gjatë muajit maj dhe Javën e Mësimit gjatë Gjithë Jetës. Ai poashtu theksoi rëndësinë e zhvillimit të mëtejshëm të ALE NK, veçanërisht në drejtim të funksionalizimit dhe formalizimit të tij.

Punëtoria vijoi me prezantime dhe ndarjen e informacioneve nga të gjitha organizatat anëtare të rrjetit. Më pas, u realizua një përmbledhje e projekteve aktuale për vitin 2024, si dhe një prezantim i planeve paraprake për vitin 2025.

Znj. Ryve Prekorogja, Udhëheqëse e Bordit të ALE NK dhe moderatore kryesore e punëtorisë, udhëhoqi diskutimet duke nxitur bashkëpunimin dhe shkëmbimin e praktikave më të mira midis anëtarëve.

Pra, në thelb kjo punëtori kishte për qëllim hartimin e një plani të qëndrueshëm për formalizimin dhe regjistrimin zyrtar të Rrjetit ALE NK, për të siguruar legjitimitetin dhe funksionalitetin e tij. Diskutimet u fokusuan në opsionet e regjistrimit të rrjetit si OJQ/OShC ose përmes një vendimi qeveritar, duke analizuar përparësitë dhe sfidat e secilës alternativë.

Pjesëmarrësit kontribuan aktivisht përmes diskutimeve, analizave dhe punës grupore, duke ndarë perspektivat dhe ekspertizën e tyre. Një fokus i veçantë iu kushtua Strategjisë Zhvillimore të Rrjetit ALE NK (2026-2030), ku u shqyrtuan objektivat dhe modalitetet e Strategjisë Sektoriale për Arsimin e të Rriturve. Përmes ideve dhe rekomandimeve të tyre, pjesëmarrësit ndihmuan në formësimin e një strategjie që reflekton nevojat dhe prioritetet e këtij sektori.

Diskutimet e fundit u përqendruan në finalizimin e Planit Vjetor 2025. Gjatë këtij sesioni, pjesëmarrësit u dakorduan mbi aktivitetet e përbashkëta dhe modalitetet e bashkëfinancimit. Ndër të tjera, u nënvizuan aktivitetet për promovimin e arsimit të të rriturve, ngritjen e kapaciteteve, avokimin për zhvillimin e Arsimit të të Rriturve dhe Arsimit Tërëjetësor, hartimin e programeve që i përshtaten nevojave të shoqërisë, bashkëpunimin me institucione kombëtare dhe ndërkombëtare, zhvillimin e objektivave të qëndrueshme në harmoni me ato vendore dhe ndërkombëtare, ofrimin e kurseve cilësore dhe atraktive, qasjen inovative të arsimit, monitorimin dhe vlerësimin e arsimit të të rriturve, si dhe digjitalizimin dhe ekonominë e gjelbërt.

Punëtoria e dytë vjetore e Rrjetit ALE NK shënoi një hap të rëndësishëm drejt funksijonalizimit, qëndrueshmërisë së rrjetit dhe koordinimit të aktiviteteve për zhvillimin e arsimit të të rriturve në Kosovë. Diskutimet produktive dhe atmosfera bashkëpunuese kontribuan ndjeshëm në arritjen e objektivave strategjike të rrjetit, duke nxitur një qasje të integruar dhe efektive në avancimin e arsimit të të rriturve në vend.