ԲԱՑ ԿԱՆՉ․ Մեծահասակների ուսումնառության և կրթության ոչ ֆորմալ ցանցին անդամակցության համար

Մեծահասակների ուսումնառության և կրթության (ՄՈՒԿ) ոչ ֆորմալ ցանցը ուրախ է հայտարարել բաց կանչ՝ նոր անդամ կազմակերպությունների / կառույցների ներգրավման նպատակով։

Ցանցի ընդլայնման նպատակն է՝

• ՄՈՒԿ ոլորտում գործունեություն ծավալող կազմակերպությունների / կառույցների միջև համագործակցության ընդլայնումն ու խորացումը,
• Ցանցի ՄՈՒԿ ջատագովության և իրազեկման կարողությունների ուժեղացումը և այդ ուղղությամբ ջանքերի համատեղումը։

1․ ՄՈՒԿ ոչ ֆորմալ ցանցի մասին

ՄՈՒԿ ոչ ֆորմալ ցանցը համախմբում է հայաստանյան կազմակերպություններ/ կառույցներ, որոնք իրականացնում են մեծահասակների ուսումնառության և կրթության որակյալ, ներառական և ազդեցություն ունեցող ծրագրեր և/կամ իրականացնում են ՄՈՒԿ ջատագովություն և/կամ ՄՈՒԿ հետազոտություններ, ուսումնասիրություններ։ Ցանցի նպատակն է խթանել ՄՈՒԿ մասնակցությունը՝ նպաստելով մեծահասակների ոչ ֆորմալ ուսումնառության օրենսդրական հիմքերի ստեղծմանը, ՄՈՒԿ մասին իրազեկվածության բարձրացմանը և որակի ապահովմանը (ավելի մանրամասն՝ տես բաժին 8)։

2․ Ովքեր կարող են դիմել

Ցանցին անդամակցության համար կարող են դիմել՝

• հասարակական կազմակերպություններ
• հիմնադրամներ
• ուսումնական և կրթական կենտրոններ, կրթահամալիրներ
• երիտասարդական կենտրոններ
• բարձրագույն ուսումնական հաստատություններ
• մասնավոր ընկերություններ
• այլ հասարակական և մասնավոր կառույցներ

որոնք իրականացնում են ՄՈՒԿ ոչ ֆորմալ կրթական ծրագրեր իրենց մեծահասակ շահառուների[1] համար, և/կամ իրականացնում են ՄՈՒԿ ջատագովություն և/կամ ՄՈՒԿ հետազոտություններ, ուսումնասիրություններ:

3․ Ինչպես դիմել

Ցանցին անդամակցությամբ հետաքրքրված կազմակերպությունը / կառույցը պետք է ներկայացնի․

1. Լրացված հայտադիմում (ՄՈՒԿ դասընթացներ իրականացնող կառույցները պետք է ներբեռնեն և լրացնեն Հայտադիմում 1 -ը, ՄՈՒԿ հետազոտություններով, ջատագովությամբ և այլ գործունեությամբ զբաղվող կառույցները՝ Հայտադիմում 2-ը)
2. Կանոնադրություն և պետական գրանցման վկայական։

Դիմում-փաթեթն անհրաժեշտ է ուղարկել առցանց տարբերակով՝ info@dvv-international.am    էլեկտրոնային հասցեին։ 

4․ Գնահատման գործընթաց և չափանիշների շրջանակ

Դիմումները գնահատվում են ցանցի խորհրդի կողմից՝ նախապես սահմանված ստորև չափանիշների շրջանակի հիման վրա։ Ընտրությունը կատարվում է հայտերի հիման վրա, սակայն մեծ թվով հավասար հավակնորդների դեպքում կարող են անցկացվել հարցազրույցներ (որոնց նպատակն է ավելի լավ պատկերացում կազմել կառույցի՝ Ցանցին միանալու պատրաստակամության և մոտիվացիայի, ինչպես նաև ՄՈՒԿ ռազմավարական տեսլականի մասին)։ Խորհրդի կողմից կատարված ընտրությունը հաստատվում է ցանցի կողմից։

1․ Արժեքային համընկնում (ՄՈՒԿ և ցկյանս ուսումնառության կարևորում, գործընկերության և համագործակցության կարևորում և արժևորում)

2․ Կազմակերպության փորձառության (ՄՈՒԿ ոլորտային գործունեություն և փորձառություն, մարդկային ռեսուրսներ, այն է՝ թիմ / դասընթացավարներ/ փորձագետներ / հետազոտողներ)

3․ 1․ ՄՈՒԿ Կրթական ծրագրերի առկայություն և թիրախային խումբ / խմբեր (ՄՈՒԿ մատակարարների դեպքում) (Կրթական ծրագրերի առկայություն, թիրախային խումբ / խմբեր, դասընթացների բնույթ)

3․2․ Կրթական / ՄՈՒԿ հետազոտություններ, իրազեկման արշավներ և այլ նախաձեռնություններ (ՄՈՒԿ ոլորտում գործունեություն ծավալող այլ կառույցների համար) (հետազոտությունների կամ իրազեկման արշավների, այլ նախաձեռնությունների առկայություն, շահակիրների հետ համագործակցություն (օրինակ՝ նախարարություններ, կրթական հաստատություններ, այլ)։

5․ Անդամակցություն և ընձեռնված հնարավորություններ

Ընտրված կազմակերպությունը ստանում է․

• ցանցի լիիրավ անդամի կարգավիճակ՝ ցանցի նպատակներին և արժեքներին համահունչ
• Ցանցի խորհրդի անդամ ընտրելու և ընտրվելու իրավունք
• ձայնի իրավունք ցանցի որոշումների կայացման մեջ
• համատեղ ծրագրերի մասնակցության հնարավորություն
• շարունակական կարողությունների զարգացում, այդ թվում՝ վերապատրաստումների, աշխատարանների, փորձի փոխանակման միջոցառումների մասնակցություն
• հնարավորություն ներգրավելու տարբեր թեմատիկ աշխատանքային խմբերին՝ համատեղ նախաձեռնությունների իրականացման համար՝ ի նպաստ ՀՀ-ում ՄՈՒԿ ջատագովության և իրազեկման

Ցանցի անդամ կազմակերպությունը պարտավորվում է՝

• մասնակցել ցանցի ժողովներին և նախաձեռնություններին
• ներգրավվել աշխատանքային խմբերում
• կիսվել փորձով, ռեսուրսներով և տեղեկատվությամբ
• պահպանել ցանցի արժեքներն ու համագործակցության սկզբունքները
• Ցանցի տարեկան ամփոփիչ ժողովի ժամանակ ներկայացնել տվյալ տարվա գործունեության համառոտ հաշվետվություն։

6․ Դիմելու կարգ և ժամկետ 

Լրացված հայտադիմումն անհրաժեշտ է ուղարկել առցանց տարբերակով info@dvv-international.am էլեկտրոնային հասցեին։ Հայտադիմումը կարող եք ներբեռնել հետևյալ հղումով.

1. Հայտադիմում 1 (ՄՈՒԿ դասընթացներ իրականացնող կառույցների համար)

2. Հայտադիմում 2 (ՄՈՒԿ հետազոտություններ, ջատագովություն, այլ գործողություններ իրականացնող կառույցների համար)

Դիմումների ընդունման վերջնաժամկետն է՝ 2026 թ․ ապրիլի 30՝ ժամը 18։00։

Ցանցին անդամակցությամբ հետաքրքրված կառույցների համար ս․թ․ ապրիլի 17-ին, ժամը՝ 12։00-ին տեղի կունենա առցանց տեղեկատվական հանդիպում։ Հանդիպմանը մասնակցելու համար խնդրում ենք մինչև ապրիլի 16-ը, ժամը 12։00 info@dvv-international.am էլեկտրոնային հասցեին ուղարկել նամակ՝ նշելով անուն, ազգանուն և էլ․ հասցե։ Հանդիպման հղումը կուղարկվի բոլոր գրանցված անձանց։ 

Հարցերի և հավելյալ տեղեկատվության համար կարող եք դիմել info@dvv-international.am էլեկտրոնային հասցեով կամ 093 971147 հեռախոսահամարով (կոնտակտային անձ՝ Տաթև Ասրյան, ծրագրերի համակարգող, Դի-Վի-Վի Ինթերնեյշնալ Հայաստան)։ 

7․ Ժամանակացույց

8․ ՄՈՒԿ ոչ ֆորմալ ցանցի մասին ավելի մանրամասն

2020թ․ Դի-Վի-Վի Ինթերնեյշնալի հայաստանյան գրասենյակի նախաձեռնությամբ և համակարգմամբ ձևավորվել է իր կողմից աջակցվող Մեծահասակների ուսումնառության և կրթության (ՄՈՒԿ) բնագավառում գործող 8 կազմակերպությունների ոչ ֆորմալ ցանց։ Ցանցն ընդլայնվել է 2025թ․-ին ևս 8 կառույցով։

Գլխավոր նպատակ

Ցանցի նպատակն է խթանել ՄՈՒԿ մասնակցությունը՝ նպաստելով մեծահասակների ոչ ֆորմալ ուսումնառության օրենսդրական հիմքերի ստեղծմանը, ՄՈՒԿ մասին իրազեկվածությանը և որակի ապահովմանը։

Ենթանպատակներ

1. Ունենալ միասնական տեսլական և արժեհամակարգ մեծահասակների ուսումնառության և կրթության զարգացման վերաբերյալ։
2. Նպաստել հասարակությունում ՄՈՒԿ-ի և դրա կարևորության մասին իրազեկվածության բարձրացմանը։
3. Նպաստել ոլորտի քաղաքականության բարեփոխումներին։
4. Նպաստել ՄՈՒԿ ծրագրերի որակի բարձրացմանը՝ չափորոշիչների մշակման, ռեսուրսների և փորձի փոխանակման, նորարարության և տեխնոլոգիաների ինտեգրման և այլ միջոցներով։
5. Նպաստել ՄՈՒԿ ծառայությունների հասանելիությանը և սոցիալական ներառականությանը։

Գործունեության տեսակները

1. Համատեղ իրականացվող հանրային իրազեկման արշավներ և շահերի պաշտպանություն/ջատագովություն
2. Կրթական ծրագրերի համատեղ մշակում և իրականացում․ համատեղ դասընթացներ, վերապատրաստումներ, մենթորական ծրագրեր։
3. Մեթոդական և գործնական աջակցություն․ ուսումնական նյութերի և ուսուցման մոդուլների համահեղինակություն, ռեսուրսների գրադարանի ստեղծում։
4. Համատեղ հետազոտություններ ՄՈՒԿ ոլորտում՝ նոր անհրաժեշտությունների բացահայտման և լավագույն փորձի ներդրման համար։
5. Կարողությունների զարգացում․ սեմինարներ, կոնֆերանսներ, փորձի փոխանակման այցեր անդամ կենտրոնների միջև։
6. Տեխնոլոգիական համագործակցություն․ էլ‐ուսուցման հարթակների և թվային գործիքների համատեղ կիրառում։
7. Ֆոնդահայթայթում և նախագծերի համաֆինանսավորում․ միջազգային դրամաշնորհներ, տեղական բյուջետային ծրագրեր, կորպորատիվ իրավակազմակերպչական գործընկերություններ։
8. Տեղեկատվության, նորությունների փոխանակում անդամների միջև՝ օրենսդական զարգացումների, ոլորտի զարգացումների ու նորությունների վերաբերյալ։
9. Շահառումների կարիքների գնահատում և նրանց շահերի ներկայացում` տեղական, մարզային և պետական մակարդակներում։
10. Այլ,  ըստ ցանցի նպատակի և խնդիրների։

Արժեքները

Անդամների համագործակցային աշխատանքում և կառավարման գործընթացներում ցանցն առաջնորդվում է հետևյալ արժեքներով․

• Թափանցիկություն՝ բաց և հստակ հաղորդակցություն բոլոր մակարդակներում։
• Պատասխանատվություն՝ սեփական հանձնառությունների ու պարտականությունների պատշաճ իրականացում։
• Համագործակցություն և բաց գործընկերություն՝ համատեղ աշխատանք փոխադարձ վստահության և հարգանքի հիման վրա։
• Բարեվարքություն՝ ազնվության, բարեխղճության և սկզբունքների կայունություն բոլոր փոխհարաբերություններում։
• Սոլիդարություն որոշումների կայացման մեջ՝ համախմբված և համերաշխ մոտեցմամբ։
• Մասնակցայնություն՝ անդամների ակտիվ ներգրավվածություն որոշումների կայացման, նախաձեռնությունների պլանավորման և իրականացման գործընթացներում։
• Բազմակարծություն՝ տարբեր կարծիքների ընդունում և խրախուսում՝ որպես աճի և զարգացման նախադրյալ։
• Ճկունություն՝ հարմարեցում փոփոխվող միջավայրին և մարտահրավերներին։
• Որակ՝ գործունեության և արդյունքների բարձր չափանիշների պահպանում

ՄՈՒԿ ոչ ֆորմալ ցանցի անդամներ 

1. «Ալվան ծաղիկ սոցիալ-կրթական կենտրոն» ՀԿ
2. Դիլիջանի համայնքային կենտրոն
3. Դի-Վի-Վի Ինթերնեյշնալի հայաստանյան գրասենյակ
4. ԵՊՀ Շարունակական կրթության կենտրոն
5. Ինստեփանավան զարգացման հիմնադրամ
6. «Խաչմերուկ» կրթական խորհրդատվական կենտրոն հիմնադրամ
7. «Կանաչ արահետ» գյուղատնտեսության աջակցության ՀԿ
8. ԿրթաԲԱՑ Ապարան
9. ԿրթաԲԱՑ Ստեփանավան
10. «Հայաստանի մանուկներ» («ՔՈԱՖ») բարեգործական հիմնադրամ
11. Հանրային լրագրության ակումբ
12. Հանրային քաղաքականության ինստիտուտ
13. «Մասնակցային դպրոց» կրթական հիմնադրամ
14. Մարտունու կանանց համայնքային խորհուրդ ՀԿ
15. «Շենացնենք մեր գյուղը» ՀԿ
16. ««Սևան» երիտասարդական ակումբ» ՀԿ
17. Սիսիանի մեծահասակների կրթության կենտրոն հիմնադրամ

[1] Մեծահասակ է համարվում ցանկացած մեկը, ով իր հասարակության կողմից համարվում է հասուն, ավարտել է առաջին ֆորմալ կրթությունը և տարբեր ձևերով շարունակում է իր ուսումնառությունը։