Në kuadër të projektit "Zhvillimi i programeve afatshkurtra (modulare) të arsimit për të rritur dhe përdorimi i këtyre programeve në kuadër të gjashtë Qendrave të Kompetencës (QK) dhe shkollave të mesme profesionale (SHKMP) në Kosovë”, më 9 nëntor 2022, është bërë prezantimi i rezultateve të dala nga hulumtimi i gjendjes paraprake të kapaciteteve teknike dhe profesionale të QK dhe SHKMP.
Pjesëmarrës në këtë punëtori ishin përfaqësues të Ministrisë së Arsimit, Shkencës Teknologjisë dhe Inovacionit (MAShTI), QK-ve dhe SHKPM-ve.
Sipas autorëve të raportit hulumtues, Muhamer Ibriqi dhe Jetmir Berisha, hulumtimi lidhur me nevojën e ofrimit dhe zbatimit të kurseve afatshkurtra modulare në Institucionet e Arsimit dhe Aftësimit Profesional (IAAP), do të shërbejë për nevojat e Agjencisë për Arsimin dhe Aftësimin Profesional dhe Arsimin e të Rriturve (AAAPARr), MAShTI-t dhe akterëve tjerë në Kosovë, si një udhërrëfyes për zhvillimin e kurrikulave dhe programeve të nevojshme arsimore për këtë komponent të kualifikimeve, duke u bazuar në specifikat e tregut të punës në vend.
Autorët theksuan se pjesë e anketimit janë 14 shkolla profesionale nga qytete të ndryshme në Republikën e Kosovës, duke përfshirë Prishtinën, Prizrenin, Mitrovicën, Gjakovën, Gjilanin, Ferizajn, Podujevën, Lipjanin, Vushtrrinë, Skenderajn, Malishevën dhe Vitinë, të cilëve përmes përgjigjeve në 28 pyetje të hapura dhe mbyllura, iu është dhënë mundësia të paraqesin gjendjen reale dhe të tregojnë mundësitë e ofrimit të kurseve afatshkurtra në ARr në varësi të kushteve që shkollat posedojnë. Gjithashtu, përmes pyetësorit shkollat kanë pasur mundësi të shprehin kërkesat e tyre në lidhje me plotësimin e nevojave të tyre në realizim të trajnimeve për mësimdhënësit, apo pajisjen e punëtorive për realizimin e praktikave profesionale.
Sipas Ibriqit dhe Berishës, të dhënat e mbledhura nga hulumtimi krijojnë mundësi për të bërë vlerësime, analiza dhe krahasime mes IAAP-ve, lidhur me ofrimin dhe zbatimin e programeve të shkurtra modulare, por edhe për identifikimin e nevojave dhe mundësive të sistemit arsimor aktual në Kosovë lidhur me këtë komponent. Zhvillimi dhe implementimi i programeve të reja të ARr do të mundësojë rritjen e qasjes gjithëpërfshirëse në programet e arsimit për të rritur, në veçanti për grupet e margjinalizuara dhe grupet tjera të të rriturve, të larguara nga procesi i arsimit në Kosovë.
Ndryshe, zhvillimi i programeve të reja për ARr në kuadër të projektit i cili implementohet nga AAAPARr, me mbështetje nga DVV International, do të bazohet në standardet e validuara dhe të miratuara nga Autoriteti Kombëtar i Kualifikimeve (AKK) dhe në harmoni me Kornizën Kombëtare të Kualifikimeve në Kosovë.
Më lartë
Printo