Pjesëmarrja e përfaqësuesve të arsimit nga Kosova në Konferencën e 15-të për Arsimin e të Rriturve në Leipzig të Gjermanisë

Konferenca e mbajtur më 20-21 qershor 2022, nën moton “vhs 2030: së bashku në diversitet të qëndrueshëm” trajtoi tre çështjet kryesore të së ardhmes, të cilat paraqesin sfida të reja, politike dhe sociale, dhe rrjedhimisht edhe sfida të reja për arsimin e të rriturve.

Për gati dy ditë, më shumë se 800 pjesëmarrës nga Qendrat e Arsimit të të Rriturve në Gjermani  (vhs), të ftuar ndërkombëtarë, përfaqësues nga politika, biznesi dhe akademia, si dhe partnerë të bashkëpunimit nga arsimi i të rriturve dhe fusha të tjera të shoqërisë civile, u takuan në Leipzig për të shkëmbyer përvoja, për të diskutuar dhe zhvilluar ide të reja për praktikat e Arsimit të të Rriturve. Nga Kosova në këtë Konferencë kanë marr pjesë: Ministrja e Arsimit, Shkencës, Teknologjisë dhe Inovacionit (MASHTI), Zj. Arbërie Nagavci, së bashku me Këshilltaren e saj Zj. Majlinda Rizvanolli –Bajraktari dhe Drejtorin e zyrës së Institutit për Bashkëpunim Ndërkombëtar të Bashkësisë së Shkollave të Larta Popullore Gjermane (DVV International) në Kosovë, Z. Ramadan Alija.

Në trend me zhvillimet globale në fushën e Arsimit për të Rritur, MASHTI dhe DVV International në Kosovë po punojnë për zhvillimin e këtij segmenti të rëndësishëm të arsimit, për t’i dhënë mundësi secilit qytetar të Kosovës të përshtatet me digjitalizimin dhe ndryshimet tjera përmes mësimit gjatë gjithë jetës.

Pjesmarrja e Ministres së MASHTI-t nga Kosova në këtë konferencë, ka rezultuar në gatishmërinë e MASHT-t për të intensifikuar bashkëpunimin e ndërsjellë me DVV International në Kosovë për të realizuar së bashku aktivitetet e specifikuara më poshtë:

• Në fund të muajit qershor, në kuadër të Fakultetit të Edukimit të Universitetit të Prishtinës, do të promovohet lansimi i programit "Curriculum GlobALE" për trajnimin e edukatorëve që merren me Arsimin e të Rriturve;
• Do të hapen dy qendra të reja për Arsimin e të Rriturve, bazuar në modelin e shkollave popullore gjermane;
• Do të krijohet një rrjet i ri për Arsimin e të Rriturve, i cili do të mundësojë koordinimin, bashkëpunimin dhe menaxhimin e të dhënave në nivel kombëtar.